Topp 10 stader for gode bilde

1. Langfoss

Langfoss er ein fantastisk foss som du kan oppleve like ved vegen E134 i Etne kommune. Fossen er stemt fram til å vere ein av dei vakraste i verda. Dette var det sjåarane til CNN Travel som gjorde. Fossefallet er på heile 612 meter. Du kan ta flotte bilde av fossen frå vegen. Her er det berre å stoppe bilen på parkeringsplassen og ta bilde rett frå rasteplassen. Du kan også gå trappene ned til fjorden. Her får du flotte bilde frå Åkrafjorden og opp fossefallet! Me anbefalar også den flotte turen Langfoss opp. Dette er ein tur på 4 timar, så pass på å ha rett turutstyr og mat med.

2. Sherpatrappene

Sherpatrappene fører opp Fossabrekko på Stord. Herifrå kan du gå mot t.d. Stovegolvet. Frå Sherpatrappene har du fantastisk utsikt og kan sjå alt frå fjord til isbre. Du ser også fleire av kommunane i Sunnhordland frå fjellet. Me anbefalar at du kjører bil frå E39 mot Fjellgardane og Lundsseter, anten frå Ådlandsvatnet eller frå Førlandskrysset (Rommetveit). I sommarhalvåret, når det ikkje er snø eller is på vegen, kan du kjøre heilt opp mot Heio og bommen på veg mot TV-masta på Stord. Herifrå kan du gå dei nylagde sherpatrappene. Du treng berre gå eit lite stykke opp i trappene før du i godt vér kan sjå Folgefonna i Kvinnherad. Heile vegen opp trappene har du fantastiske motiv for feriebilda dine.

3. Bekkjarvik

Vakre Bekkjarvik er ein gammal handelsstad i Austevoll kommune. Du finn gode motiv både frå sjøkanten eller om du går litt opp i høgda. Bekkjarvik er eit levande sentrum med både handlesenter og restaurantar. I Bekkjarvik ligg også Bekkjarvik Gjestgiveri, som i tillegg til å vere eit ærverdig gjestehus med restaurant og konferansemoglegheiter er det eldste huset i Bekkjarvik. I Bekkjarvik er det også pub, uteservering og galleri, samt ein flott park knytt til gjestgiveriet.

Du kjem lett til Bekkjarvik både med bil og ferje, eigen båt eller hurtigbåt. Bekkjarvik hamn er ein svært populær stad for båtturistar. Her er det flott kai midt i sentrum og plass til 140 båtar.

Foto: Vibeke Møgster

4. Midtfjellet Vindmøllepark

Midtfjellet Vindpark ein av dei aller største i sitt slag i Noreg, med sine 44 vindmøller. Kulissane med dei majestetiske vindmøllene gjer det heile unikt og spesielt og ein flott plass å ta gode bilde. Utsikten mot Fitjarøyane er også vel verd besøket. Med ein framifrå infrastruktur av vegar er fjellet lett tilgjengeleg for fotturar, sykkelturar, motbakkeløp, skileik, fisketurar og familieturar i omgjevnader der dyre- og fuglelivet er rikt. Vindparken kan du nå gjennom eit utal av stiar frå ulike delar av kommunen. Ynskjer du å nytta hovudvegen inn i parken, tek du av frå riksveg 545 ved Rimbareid, om lag 1,5 kilometer sør for Fitjar sentrum. 

Det er asfaltert vei opp til vindmølleparken med parkering til ca. 50 bilar. Her køyrer du heilt opp til fjellet, kor du går rett ut på 27 km med grusvei. Vegene mellom vindmøllene er merka med nummer.

Foto: Toralv M. Brekke

5. Blåbærhaugen

Frå Blåbærhaugen på Tysnes er det fantastisk utsikt i mange retningar. Toppen ligg på 297 moh. Her ser du bl.a mot Onarheimsfjorden og fjella i Kvinnherad. Nydeleg plass for å ta gode bilde – og også eit svært populært turmål. Det går sti frå Onarheim sentrum og opp til Blåbærhaugen. Turen er ca 8 km tur/retur, og har ei stigning på 297 høgdemeter. På toppen er det eit flott platå og gode moglegheiter for rast.

Foto: Åshild Matre

6. Ryvarden kulturfyr

Ryvarden kulturfyr i Sveio kommune er eit populært utfartsmål og ein flott stad å ta gode bilde. Her er det utsyn over Nordsjøen, Sletta, Bømlafjorden og til øyane vest i havet. Fyret på Ryvardsneset er eit kjent landemerke på kysten. Frå Mølstrevåg er det 2 km å gå på god grusveg.

Foto: Toralv M. Brekke

7. UFO-ringen på Espevær

Espevær er kjent for «Ufo-ringen», som vart oppdaga i 1975 og som framleis er like tydeleg. Turistar kan gå tur på Espevær og sjå på "Ufo - ringen" – og ta bilde av fenomenet. Det er fleire teoriar på korleis ufo-ringen har kome der, men ingen veit med sikkerhet kva som har skjedd.
Espevær er ei bilfri kystperle i Bømlo kommune. Hit kjem du med hurtigbåt frå Langevåg på Bømlo.

Foto: Toralv M. Brekke

8. Baroniet Rosendal

Baroniet Rosendal er det minst slottet i Skandinavia og eit svært populært turistmål. Baroniet ligg fantastisk til mellom flotte fjell. Utanfor finn du rosehagen, som står i full blomst på sommaren. Også den vel verd eit foto. Ta også gjerne turen i den romantiske landskapsparken. Besøkjer du Baroniet i opningstida i sommarhalvåret, kan du nyte lunch eller middag i ein av restaurantane. Baroniet Rosendal ligg i Kvinnherad kommune.

Foto: Linda Løvfall

9. Blådalen med utsikt til Folgefonna, Møsevassbreen

Ta turen opp i Blådalen og få fantastisk utsikt over Møsevatnet og sørenden av Folgefonna.

Det er 1 times kjøretur frå Rosendal til Møsevatnet (kun mogleg for personbil). Her finn du kjørerettleiing for turen opp.

Går du over dammen/demningen og opp på næraste haug får du fantastisk utsikt over Møsevatnet og sørenden av Folgefonna. (Tek ca. 10 .min å gå opp)

Frå rasteplassen får du utsikt over Møsevassbreen (som er ein brearm av Folgeonna) og Møsevatnet . På Møsevatnet kan du sjå flytande isflak som har kalva frå Folgefonna isbre.

Ellers kan ein gå rundt i området på begge sider av dammen/demninga. Men ein må vera varsam, og på breen kan ein kun gå med ein autorisert breførar frå Folgefonni Breførarlag.

10. Peparen

Peparen er ei lita skogskledd øy som ligg i Skånevik. Det er gangbru ut til øya, der du finn flotte moglegheiter for å raste. Både på vegen ut til Peparen og på sjølve øya finn du flotte motiv for bilde. På øya er det både fin sandstrand og stupebrett.